बिजिडब्लुएसद्वारा दशैं भेटघाट कार्यक्रम

ब्रिटिश गोर्खा वेलफेयर सोसाइटी (बिजिडब्लुएस) ले विजया दशमी २०६८ को शुभ अवसरमा फार्नबरोमा रमाइलो भेटघाट तथा सांस्कृतिक कार्यक्रम आयोजना गर्यो।

गत शनिबार फार्नबरोस्थित पहिले ओकफार्म कम्युनिटी स्कूल रहेको भवनमा आयोजित कार्यक्रममा गोर्खा समुदायका युवा तथा विद्यार्थीहरुले विभिन्न मनोरन्जक सांस्कृतिक कार्यक्रमहरु प्रस्तुत गरेका थिए।

कार्यक्रममा बोल्दै सोसाइटीका अध्यक्ष सेवानिवृत्त मेजर टिकेन्द्रदल देवानले विजया दशमीको अवसरमा सबैलाई शुभकामना दिनुभएको थियो। उहांले समाजको गत वर्षका उपलब्धिहरुका बारे चर्चा गर्दै गत महिनामात्रै सामुदायिक रेडियोको रुपमा रेडियो बिजिडब्लुएस शुरु गर्न सकेकोमा प्रसन्नता व्यक्त गर्नुभयो। उहांले रेडियो बिजिडब्लुएस सन्चालनमा ल्याउन अथक मेहनत गरिरहनुभएका बिजिडब्लुएसका मिडिया डाइरेक्टर सेवानिवृत्त मेजर सोनाम शेर्पा तथा अन्य स्वयम्सेवीहरुलाई पनि धन्यवाद ज्ञापन गर्नुभयो।

अध्यक्ष देवानले भविष्यमा एउटा सामुदायिक टेलिभिजनपनि सन्चालन गर्ने आफ्नो संस्थाको चाहना रहेको बताउंदै त्यसमा सघाउन सबैलाई आग्रह गर्नुभएको थियो।

सो अवसरमा हालै एसियन अचिभर्स अवार्डबाट सम्मानित मेजर देवान र श्रीमती देवानलाई खादा तथा फूलमालाले सम्मान गरिएको थियो।

रात्रीभोज पछि शुरु भएको सांस्कृतिक कार्यक्रममा यमुना, अन्जी, एलेना, कुमारी, एलन, सुमन, बन्दना, सलिना, मेलिना लगायतका कलाकारहरुले मनमोहक नेपाली गीत तथा नृत्य प्रस्तुत गरेका थिए।

त्यस्तै अलित, संगम, सुरज, बिष्णु र जितिरामले ब्रेक डान्स प्रस्तुत गरेका थिए।

एक अर्को प्रस्तुतिमा गायक सुरज गुरुङलाई बांसुरीमा कूलबहादुर थापाले साथ दिनुभएको थियो। कार्यक्रमको संचालन बिजिडब्लुएसका जनसंपर्क अधिकृत प्रकाश गुरुङले गर्नुभएको थियो भने सांस्कृतिक कार्यक्रमको सन्चालन सुश्री शिला श्रद्धा लिम्बुले गर्नुभएको थियो।

कार्यक्रममा बिजिडब्लुएसका सदस्य तथा परिवारहरुको आकर्षक उपस्थिति थियो।